Strandhreinsun 2026

Sæplast og 9. bekkur hreinsa strandlengjuna á Umhverfisdegi Dalvíkurskóla

Röskur hópur unglinga úr 9.bekk ásamt tveimur kennurum tók þátt í ruslatínslu með Sæplasti 1. júní, en þann dag var Umhverfisdagur Dalvíkurskóla.

Kristbjörn Sævaldsson og Elías Björnsson stýrðu hreinsuninni fyrir hönd Sæplasts. Þetta var 9. árið í röð sem hreinsunin fer fram. Genginn var Sandurinn frá árósum Svarfaðardalsár alla leið vestur að syðri hafnagarðinum við Sunnutún og sýnilegt rusl tínt í poka.

Verkefni sem þetta skiptir miklu máli, bæði fyrir nærumhverfið og samfélagið í heild. Með þátttöku í strandhreinsun fá unglingarnir tækifæri til að sjá með eigin augum hversu mikilvægt það er að koma í veg fyrir að plast og annar úrgangur endi í náttúrunni. Slík reynsla eykur umhverfisvitund, hvetur til ábyrgðar og sýnir að sameiginlegt átak getur haft raunveruleg áhrif.

Ruslatínsla á svæðum eins og Sandinum er einnig mikilvægur liður í því að vernda lífríki strandarinnar og halda svæðinu hreinu og fallegu fyrir íbúa, gesti og komandi kynslóðir. Það er ánægjulegt að sjá ungt fólk taka virkan þátt í verkefni sem hefur skýran tilgang og skilur eftir sig sýnilegan árangur.

Sæplast er þátttakandi í Strandhreinsun Íslands, sem er 5 ára átaksverkefni stjórnvalda í hreinsun strandlengjunnar af plasti og öðrum úrgangi. Sæplast styrkir 9.bekk með 120.000 kr framlagi í ferðasjóð fyrir þátttökuna í ár og hvetur þau til að halda áfram að ganga vel um umhverfi sitt hvar sem þau eru stödd.