Íslenska Sjávarútvegsráðstefnan 2025
- This event has passed.
Sjávarútvegsráðstefnan
Markmið Sjávarútvegsráðstefnunnar er að vera vettvangur fyrir fræðslu, umræðu og samstarf innan sjávarútvegsins. Ráðstefnan miðar að því að sameina fagaðila og hagsmunaaðila til að ræða mikilvæg málefni, þróun og tækifæri í geiranum. Þetta felur í sér að skoða rekstrar- og starfskilyrði sjávarútvegs, efnahagslega nauðsyn sjálfbærs sjávarútvegs, og verkefni fyrirtækja í sjávarútvegi til sjálfbærs rekstrar. Einnig er lögð áhersla á sjálfbærni og samfélagslega ábyrgð, sem eru grundvallarþættir í nýtingu endurnýjanlegra auðlinda.
Verðmætasköpun og samkeppnishæfi í íslenskum sjávarútvegi
Sú hefð hefur skapast að ráðstefna hvers árs hefur sína megin yfirskrift sem myndar rauðan þráð í málstofum. Yfirskrift ráðstefnunnar í ár er „Róum í sömu átt! – Verðmætasköpun og samkeppnishæfni í íslenskum sjávarútvegi.“
Opnunarmálstofan setur tóninn fyrir ráðstefnuna með lifandi samtali um leiðina fram á við – þar sem sjónarmið stjórnvalda, atvinnulífs og virkt samspil við gesti ráðstefnunnar mætast.
Þar verður fjallað um hvernig skapa má sameiginlega stefnu og framtíðarsýn sem byggir á trausti, gagnsæi og sátt milli þjóðar og atvinnugreinar. Breytt rekstrarumhverfi og alþjóðleg samkeppni kalla á að við skoðum hvernig tryggja megi jafnvægi milli þjóðarhagsmuna og samkeppnishæfni greinarinnar. Hvernig nýtum við þjóðarauðlindina á sjálfbæran hátt, tryggjum nýsköpun og verðmætasköpun innanlands og verjum um leið störf og lífsgæði í sjávarbyggðum?
Við undirbúning ráðstefnunnar í ár hefur tekist vel að halda yfirskriftinni sem þræði í gegnum málstofur og búast má við þéttri dagskrá og líflegum erindum í þeim átta málstofum sem faghópar hafa sett saman. Von er að viðfangsefnin muni fræða, vekja til umhugsunar, hvetja til hugmynda, úrlausna og samstarfs allra hagaðila íslensks sjávarútvegs.
Til að halda utan um yfirskrift ráðstefnunnar verður samantektarmálstofa í lok ráðstefnunnar sem verður í höndum Bergs Ebba Benediktssonar og Birnu Einarsdóttur. Þau munu draga saman helstu umfjöllunarefni og lærdóma ráðstefnunnar, varpa ljósi á það sem sameinar og skilur, og setja umræðuna í stærra samhengi.